30.03 (четврток), 19.00 ч.

Игран филм, САД, 119 мин., црно-бел
Режија: Орсон Велс (Orson Welles)

Свечено отворање на Филозофски Филмски Фестивал 2017 и излагање на тема „Навраќање“ - проф. д-р Љубомир Цуцуловски

Култното остварување на Орсон Велс, според многумина најдобриот филм на сите времиња, останува симбол за техничко совршенство, наративна оригиналност и автентична режија. Чарлс Фостер Кејн, еден од најмоќните и најбогати луѓе во Америка, на својата смртна постела го изговара мистериозниот збор „Роузбад“. Во обид да го одгатне значењето на зборот, еден новинар раскажува приказна за момче одвоено од своето семејство. Младич полн со идеали којшто решава да биде издавач. Маж што се венча со внуката на претседателот на САД. Човек што се здобива со моќ онолку колку што ја губи својата душа. Парите и славата се недоволни за адекватна компензација на загубените младешки идеали; истото се случува и со Америка којашто ја отелотворува граѓанинот Кејн.

31.03 (петок), 20.00 ч.

Игран филм, Србија, 90 мин., колор
Режија: Иван Јовиќ (Ivan Jović)
Сценарио: Моња Јовиќ (Monja Jović)

Mастерклас со Иван и Моња Јовиќ на тема „Теологија на филмот – светлописание на филмот ‘Исцеление’“

Филмска драма за драмата и немирот коишто се вгнездени во човечките срца и по завршувањето на војната. Херојот на филмот е православен христијански монах на пат на духовно исцеление низ претходно незамисливи ситуации. Приказната ја следи скалата на духовното воздигнување, метафорички претставено на почетокот на филмот преку патот на монахот кон издвоен испоснички живот. Лајтмотивот на полевањето на суво, мртво дрво што се повторува низ целиот филм, ја илустрира апсурдноста на вербата на монахот. Постојаната парализа на карактерите поради страданијата од војната го потенцира простувањето како единствено средство за вистинско исцеление.

01.04 (сабота), 20.00 ч.

Документарен филм, Норвешка, Данска, Германија,
88 мин., колор
Режија: Кристин Син (Christine Cynn)

Q&A со Кристин Син по проекцијата на филмот

Тринаесет животи чиишто судбини биле испреплетени со трговијата на оружје се сретнуваат во Берлин. Овие луѓе доаѓаат од целиот свет за да напарават драматизација и да ги снимат своите лични искуства за „Situation Rooms“, шоу на Берлинската театарска група „Римини Протокол“. Режисерката Кристин Син продолжува со своето истражување на насилството започнато во „Акт на убивање“, документарен филм кој го има ко-режирано со Џошуа Опенхајмер и кој беше номиниран за Оскар за најдобар документарен филм во 2014 година. „Со вперени камери“ зборува за чудесната атмосфера на оваа футуристичка продукција, во која непознати луѓе од целиот свет - и од сите страни на политичкиот спектар - се подложени на театарскиот свет во кој сите гледишта еднакво се третираат. Ова е приказна за дисфункционално, но топло семејство, чиишто членови се поврзани со оружје и војни.

03.04 (понеделник), 20.00 ч.

Игран филм, САД, 137 мин., колор
Режијa и сценарио: Камерон Кроу (Cameron Crowe)

Излагање на тема „Фикцијата на киберпанкот како автентично искуство на стварноста“ – доц. д-р Вангел Ноневски и отворена дискусија со публиката

Дејвид Ејмс (Том Круз) сѐ што има го зема здраво за готово: богатството, наследената компанија, надворешниот изглед, но, пред сѐ, неговите љубовни врски. По една бурна вечер со одмаздољубивата пријателка/повремена партнерка неговиот живот се претвора во кошмар. Растргнат помеѓу две жени Дејвид запаѓа во соновидна, извртена реалност, каде што секој аспект од неговата психа излегува на виделина.

05.04 (среда), 20.00 ч.

Ревија на кратки филмови и разговор со
проф. д-р Стефан Сидовски, 41 мин.

Култниот корчагински професор, филозоф и режисер – Стефан Сидовски – оваа година на Филозофскиот Филмски Фестивал ќе се претстави со краток избор од неговите краткометражни филмови. Ревијата филмови ќе биде составена од: Контејнер (2008), Полуден револуционер (2006), Raison d’être (2015), Средба (2014), Големиот оратор (2007), C’est la vie (2016), In Continuo (2009). По проекцијата следува дискусија со професорот Сидовски.

06.04 (четврток), 20.00 ч.

Игран филм, Германија, 107 мин., колор
Режија и сценарио: Денис Генсел (Dennis Gansel)

Излагање на тема „Бранот: Човечката психологија и авторитарноста“ – проф. д-р Јасна Котеска и отворена дискусија со публиката

Базиран на роман, а инспириран од идејата за општествени експерименти, „Бранот“ зборува за обидот на еден професор да го промени светот. Средношколскиот професор Рајнер Вегнер е омилен меѓу учениците, но истовремено е невообичаена личност. Сакајќи да ги научи учениците на идејата за автократија, тој ги поттикнува да симулираат самовладеење како општествен облик. За жал експериментот излегува од контрола и почнува да наликува на историското минато на Германија. Соочени со новонастанатиот ужас, ќе успеат ли Вегнер и неговите ученици да се избават од стравичните околности?

07.04 (петок), 19.00 ч.

Игран филм, Македонија., 127 мин., колор
Режија и сценарио: Милчо Манчевски

Свечено затворање на Фестивалот со доделување на наградите и излагање на тема „Естетиката и насилството. За филмот ‘Прашина’ на Милчо Манчевски“ – проф. д-р Драган Проле од Филозофскиот факултет во Нови Сад, Србија

„Прашина“, второто филмско остварување на Манчевски, е приказна распослана на два континента и низ три столетија, во којашто балканскиот див исток се судира со американскиот див запад. Во САД ја следиме братската борба за љубовта на една жена, а на Балканот обидот на еден млад револуционер да ја ослободи Македонија од Отоманската империја. Филмот е предмет на бројни култоролошки анализи, филмски есеи и расправи, со што дополнително ја потврдува својата (уметничка, естетичка, културна) вредност во нашите локални рамки, но и многу, многу пошироко.

31.03 (петок), 17.00 ч.

Игран филм, Киргистан, 112 мин., колор
Режија и сценарио: Бакит Мукул (Bakyt Mukul), Дастан Жапар Улу (Dastan Zhapar uulu)

Враќајќи се од Америка кадешто живеел како имигрант 15 години, Азат се враќа во Киргистан во неговото родно село. Неговиот татко, Мурат, умира во туѓина и му остава аманет на синот да ги врати долговите. Филмот којшто беше селектиран од Киргистан како кандидат за „Оскар“ во категоријата за најдобар филм од неанглиско говорно подрачје, е филмско деби на двајцата режисери што отвора бројни прашања за миграцијата како тема, не само на луѓето од Киргистан, туку и на модерното општество во целина. Може ли по долго отсуство некој навистина да се врати дома?

01.04 (сабота), 17.00 ч.

Игран филм, Австрија, 130 мин., црно-бел
Режија и сценарио: Пeтер Шрајнер (Peter Schreiner)

Една жена и еден маж. Островот Лампедуза – местото каде што им се вкрстуваат патиштата на бегството. Захарија, во своите доцни дваесетти години е бегалец од граѓанската војна во Сомалија, којшто го ризикувал животот на бродовите преку Медитеранот. Џулија, во своите педесети, е турист од Северна Италија и бега од личните тегоби. Овој филм (кој е ненаметлива мешавина на документарен и игран филм) е експериментално дело на Пeтер Шрајнер базирано на искуството дека кинематографијата е секогаш на некој начин поврзана со автентичноста. Прикажуван и наградуван на бројни филмски фестивали, „Лампедуза“ низ суптилните психолошки димензии на средбата помеѓу Захарија и Џулија отвора голем број на егзистенцијални прашања за животот и смртта, но и за нашата политичка стварност.

02.04 (недела), 17.00 ч.

Игран филм, Грција, 110 мин., колор
Режија и сценарио: Елиас Димитриу (Elias Demetriou)

Што се случува кога ќе дознаеш дека твоето време истекува? Што е најважното нешто доколку ви кажат дека се ближи крајот на вашиот живот? Жена, чија смрт е речиси на прагот, решава да покани бездомник во својот дом. Во обид да го надмине стравот од смртта сфаќа дека повеќе не се грижи за својата смрт, туку за туѓата. Елиас Димитриу, режисерот на филмот, вели дека ова не е филм за болката и страдањето, туку приказна за тоа како да љубиме и да веруваме во другите. На пример, во еден странец без покрив над главата…

03.04 (понеделник), 17.00 ч.

Игран филм, Романија, Литванија, Молдавија, 87 мин., колор
Режија и сценарио: Игор Кобилеански (Igor Cobileanski)

Црна комедија од Молдавија која ја отсликува траги-комичната Источна Европа. Двајца мажи, Маријан и Петро коваат план да заработат пари како бизнис партнери. Едниот сонува да се ожени за својата вереница, а другиот да купи кран и да живее изнајмувајќи го. Со измами, пресврти и чуда двајцата се обидуваат да ги надминат темните околности во коишто живеат и без разлика на апсурдните ситуации во коишто се наоѓаат да не го изгубат оптимизмот. Станува збор за филм што ги меша двата радикални полови на драмата и комедијата во што режисерот, Игор Кобилеански, се чувствува најудобно.

04,04 (вторник) 17.00 ч.

Игран филм, Иран, 80 мин., колор
Режија и сценарио: Фарзин Камалиниа (Farzin Kamalinia)

Симин е осамена и ментално растроена жена. Откако исчезнува нејзиниот сопруг, таа е принудена да го преземе животот во свои раце и да се соочи со мажите на кои најзиниот сопруг им е должен. „Вдовицата во црно“ е приказна за загубата, нестабилноста и одмаздата, за моралните дилеми при соочувањето со злото. Иранскиот режисер Камалиниа визуелно ни го илустрира постепеното губење на свеста на една жена којашто се одвојува од стварноста и одлучува да прави опасни нешта.

05.04 (среда) 17.00 ч.

Игран филм, Грузија, 72 мин., колор
Режија: Гиорги Абашишвили (Giorgi Abashishvili)

Девет приказни од Грузија и Германија раскажуваат за убавината и трагичноста на човекувањето. Едно момченце го очекува изненадување на патот до училиштето. Млад молер ја открива магичната моќ на поезијата. Загубениот човек на железничката станица е во залудна потрага по времето, додека еден старец го губи својот внук во големиот град, а еден човек талка по гробиштата. Една двојка е заслепена од сончевиот сјај, а еден старец се збогува со сонцето и со светот на луѓето. Полни со надеж, девственост, нежност и возвишеност овие приказни базирани на делата на грузискиот писател Нодар Думбадзе (Nodar Dumbadze) зборуваат за човечката состојба во сите нејзини бои.

06.04 (четврток) 17.00 ч.

Игран филм, Полска., 82 мин., колор
Режија и сценарио: Михау Вегрзин (Michał Węgrzyn)

По кавгата со својата сопруга, Адам оди кај љубовницата. Подоцна, трчајќи 20 километри на патот до дома го пресретнува телефонски повик што му го менува животот. Сопственикот на телевизијата за којашто работи го унапредува во уредник на вечерните вести што е остварување на неговите соништа. Пред очите на Адам се исцртува блескава кариера и иднина, не знаејќи дека животот му е во распаѓање… Адам има само деведесет минути да си го среди животот.

02.04 (недела), 20.00 ч.

Игран филм, Шпанија, 18 мин., колор
Режија и сценарио: Пилар Паломеро (Pilar Palomero)

Јоана е седумгодишно девојче коешто живее близу едно мало село каде живее дедо ѝ, сопственик на антикварница. Додека мајка ѝ се бори со болеста којашто долго време ја држи врзана за кревет, Јоана ги минува деновите со дедо ѝ во антикварницата. Гледајки ги старите предмети што се осудени на заборав, Јоана сфаќа дека и мајка ѝ, и сѐ што има и чувствува еден ден ќе стане само сеќавање.

02.04 (недела), 20.00 ч.

Игран филм, Русија, 28 мин., колор
Режија и сценарио: Владимир Белдиан (Vladimir Beldian)

Стара жена е во претсмртна постела во дом за нега на стари лица и нејзините три последни желби се да јаде пудинг (1) додека слуша мал хор (2) и… бумбарот да зуи надвор од прозорецот (3). Старицата секако е свесна дека некои од тие желби се тешко остварливи. Луѓето околу неа се мошне различни – и секој од нив има своја сопствена врска со смртта.

02.04 (недела), 20.00 ч.

Игран филм, Белгија, 27 мин., колор
Режија: Џенис Адриансен (Jeannice Adriaaansens)

Хелен, постара жена, се труди да ја пополни празнината во својот живот. По смртта на нејзиниот единствен син, таа и нејзиниот сопруг се оддалечуваат и Хелен не може да најде светли точки во светот околу себе. Случајната средба со 17-годишниот Арне ќе смени сè. И Арне има празнина која треба да ја пополни, иако можеби не е свесен за тоа. Нивната кратка средба носи неочекувана спонтаност и отвара простор за чувства што го менуваат нивниот поглед кон светот и нивната ситуација. Или можеби сепак не?

02.04 (недела), 20.00 ч.

Игран филм, Италија, 20 мин., колор
Режија и сценарио: Самјуел Алфани (Samuele Alfani)

Што се случува кога поради недостиг на комуникација кај една двојка се создаваат табуа? Кој е X факторот што ги руши овие табуа? Во еден апартман ја вкусувате врската меѓу Елена и Камила, врска во која двете се соочуваат со тешкотиите произлезени од овие табуа. Кон крајот, со пристигнувањето на еден гостин на мошне значајната вечера, доаѓа до најнепосакуваната ситуација.

02.04 (недела), 20.00 ч.

Игран филм, Македонија, 10 мин., црно-бел
Режија и сценарио: Ивица Димитријевиќ

„Случајот“ е краток ноар филм во којшто го следиме човекот во мантил во неговите подвизи. Талкајќи низ градскиот метеж и чекајќи да се стемни за да може да појде во акција, човекот во мантил се наоѓа во непријатна ситуација… Воден од својата решителност да ја заврши започнатата мисија, тој станува клучот за решението. Никогаш не се знае што носи следниот миг. Секое зошто носи некое затоа.

02.04 (недела), 20.00 ч.

Игран филм, САД., 6 мин., црно-бел
Режија и сценарио: Џим Филипс (Jim Phillips)

„Пред крајот“ е драма која се случува на еден многу специфичен ден – 3. ноември 1954 год. – во Токио, Јапонија. Филмофилите ќе го препознават овој датум како денот кога се одвива дејството во маестралниот филм „Годзила“ на Иширо Хонда. Филмот ги прикажува стравот, уништувањето и насилството во градот Токио од кои не може секој да избега. Ова е приказна за жена којашто е немоќна да стане од кревет и не може да избега. Ова е приказна за нејзиниот сопруг кој, знаејки дека не можат да избегаат заедно, решава да остане со неа. И најважно, ова е приказна за последните моменти на еден пар којшто останува без секаква надеж за спас од претстојната несреќа.

02.04 (недела), 20.00 ч.

Игран филм, Иран, 13 мин., црно-бел
Режија и сценарио: Амир Лашкари (Amir Lashkari)

Границата меѓу животот и смртта е краток момент…

04.04 (вторник), 20.00 ч.

Игран филм, Бразил, 11 мин., колор
Режија и сценарио: Педро Карчерери (Pedro Carcereri)

Каде што живее Марија, водопадот е единственото место со кое и е потребно збогување.

04.04 (вторник), 20.00 ч.

Игран филм, Грција, 17 мин., колор
Режија и сценарио: Апостолис Илиопулос (Apostolis Iliopoulos)

Животот на еден антиквар се менува кога тој се обидува да го најде писателот на еден неиздаден роман што го наоѓа во ѓубре.

04.04 (вторник), 20.00 ч.

Игран филм, Македонија, 21 мин., црно-бел
Режија и сценарио: Давид Дољаница (David Doljanica)

Поранешен монах на стари години се враќа во манастирот во којшто живеел кога бил млад, обидувајки се да се наврати на своите први искуства со верата и да пронајде некаков внатрешен мир.

04.04 (вторник), 20.00 ч.

Игран филм, Јужна Кореа, 19 мин., колор
Режија и сценарио: Чеј Хан-јунг (Chae Han-young)

В зори еден човек доаѓа да закопа нешто на место каде што наскоро ќе се гради. Наидува на стражар којшто го замолува да го најде Јонг-ил чијашто мајка упорно го бара во пустината. Судбините на двата лика се претплетуват на начин на кој се пребродува бездната што ги разделува. Филмот со својата неконкретност ја доловува приказната на едно запустено место коешто е тивко од (гласната) тага што ја носи во себе.

04.04 (вторник), 20.00 ч.

Игран филм, Канада, 14 мин., колор
Режија: Максим-Клод Лекуе (Maxime-Claude L'Écuyer)

Еден човек се враќа дома по живот поминат во војување. Во напуштената куќа во којашто некогаш бил среќен, тој се труди да се поврзе со она што го загубил. Каењето го исполнува неговиот живот, додека неговото неисполнето ветување му ги прогонува спомените.

04.04 (вторник), 20.00 ч.

Игран филм, Шпанија, 7 мин., црно-бел
Режија и сценарио: Марк Надал (Marc Nadal)

Базиран на вистинска приказна, филмот следи едно иселување во 2014 година. Таа година имало 189 иселувања на ден или две иселувања секои 15 минути. Ова иселување се случило во пет часот попладне.

04.04 (вторник), 20.00 ч.

Игран филм, Грција, 29 мин., колор
Режија и сценарио: Константина Коѕамани (Konstantina Kotzamani)

Леопардот ќе легне до козата. Волците ќе живеат со јагнињата. А младото момче ќе ги води. 12+1 дете и труп на кит исфрлени на брегот…