Наградени филмови ФФФ 2017
Наградите за Најдобар долгометражен и Најдобар краткометражен филм според публиката и жирито беа објавени на Свeченото затворање на 7. Филозофски Филмски Фестивал на 7 април 2017 во Кинотеката на Македонија. Наградата за најдобар краткометражен филм според жирито отиде во рацете на режисерот Максим-Клод Лекујер (Maxime-Claude L’Écuyer) и филмот „Софија“ (Zsofika), додека „Лимбо“ (Limbo) на Константина Коѕамани (Konstantina Kotzamani) од Грција доби Специјално признание од жирито. За Најдобар краткометражен филм според публиката беше прогласен „Пролетна поплава“ (Spring Flood) на Џенис Адриансен (Jeannice Adriaansens) од Белгија. Во Селекцијата на долгометражни филмови, еден филм ги освои срцата и на жирито и на публиката – грузискиот филм „Сè за луѓето“ (All About People) на режисерот Гиорги Абашишвили (Giorgi Abashishvili). Честитики до сите режисери и нивните тимови и многу успех во понатамошната работа! На крајот, огромна благодарност до скулпторот Перо Кованцалиев и до РЖ Институт за спонзорството на статуетките „Златен був“ на ФФФ 2017.
Најдобар долгометражен филм според жирито и Најдобар долгометражен филм според публиката
СÈ ЗА ЛУЃЕТО (All About People, 2016)
Игран филм, Грузија, 72 мин., колор
Режија: Гиорги Абашишвили (Giorgi Abashishvili)
Девет приказни од Грузија и Германија раскажуваат за убавината и трагичноста на човекувањето. Едно момченце го очекува изненадување на патот до училиштето. Млад молер ја открива магичната моќ на поезијата. Загубениот човек на железничката станица е во залудна потрага по времето, додека еден старец го губи својот внук во големиот град, а еден човек талка по гробиштата. Една двојка е заслепена од сончевиот сјај, а еден старец се збогува со сонцето и со светот на луѓето. Полни со надеж, девственост, нежност и возвишеност овие приказни базирани на делата на грузискиот писател Нодар Думбадзе (Nodar Dumbadze) зборуваат за човечката состојба во сите нејзини бои.
Trailer: https://youtu.be/uswrGT2o06Q
Website: http://www.nurfilmgroup.de/allaboutpeople.html
Најдобар краткометражен филм според жирито
Софија (Zsofika, 2014)
Игран филм, Канада, 14 мин., колор
Режија: Максим-Клод Лекује (Maxime-Claude L’Écuyer)
Еден човек се враќа дома по живот поминат во војување. Во напуштената куќа во која некогаш бил среќен, тој се труди да се поврзе со она што го загубил. Каењето го исполнува неговиот живот, додека неговото неисполнето ветување му ги прогонува спомените.
Trailer: https://vimeo.com/95030659
Facebook: https://www.facebook.com/zsofikafilm
Најдобар краткометражен филм според публиката
ПРОЛЕТНА ПОПЛАВА (Spring Flood, 2015)
Игран филм, Белгија, 27 мин., колор
Режија: Џенис Адриансен (Jeannice Adriaaansens)
Хелен, постара жена, се труди да ја пополни празнината во својот живот. По смртта на нејзиниот единствен син, таа и нејзиниот сопруг се оддалечуваат и Хелен не може да најде светли точки во светот околу себе. Случајната средба со 17-годишниот Арне ќе смени сè. И Арне има празнина која треба да ја пополни, иако можеби не е свесен за тоа. Нивната кратка средба носи неочекувана спонтаност и отвара простор за чувства што го менуваат нивниот поглед кон светот и нивната ситуација. Или можеби сепак не?
Trailer: https://vimeo.com/113280411
Website: https://www.behance.net/gallery/2937045/Springtij
Facebook: https://www.facebook.com/springtijfilm
Специјално признание од жирито
ЛИМБО (Limbo, 2016)
Игран филм, Грција, 29 мин., колор
Режија и сценарио: Константина Коѕамани (Konstantina Kotzamani)
Леопардот ќе легне до козата.
Волците ќе живеат со јагнињата.
А младото момче ќе ги води.
12+1 дете и труп на кит исфрлени на брегот…
Trailer: https://vimeo.com/165930101
Website: https://limboshortfilm.com/
![](https://2022.philosophicalfilmfestival.mk/wp-content/uploads/2017/12/specijalna-proekcija11-300x200.jpg)