Официјална селекција на краткометражни филмови

15 април (недела), 18.30
Кинотека на Македонија
КРАЈОТ НА ВРЕМЕТО (The End of Time, 2017)
реж. Милчо Манчевски (US/CU), 5’


Импресивна минималистичка феноменологија на времето, свеста и себството. Едно сончево кубанско попладне на улица во Сан Антонио де Лос Бањос кадрираниот мизансцен постепено се распаѓа, фрагментирајќи се во кристална сликовна структура со дисритмичко траење на целината, микро-сликовен архипелаг со нееднакво забавување на деловите. Потрагата по фиксна точка хипнотизира, малаксува и ги изместува нормалните услови на перцепцијата на времето. КРАЈОТ НА ВРЕМЕТО на Манчевски, добитник на престижната награда Елен на еден од најреномираните филмски фестивали за краток филм во Аспен, како и награда на чешкиот фестивал на документарен и експериментален филм Јихлава, е неверојатно привлечна филмска и уметничка разиграност, експериментално трансцендентално патување до нешто што ни е многу познато а тешко дофатливо, до оние ретки и безвремени мигови кога се чувствуваме целосно свои, целосно кај себе/при себе.

15 април (недела), 18.30
Кинотека на Македонија
SUB TERRAE (2017), реж. Најра Санс Фуентес
/ Nayra Sanz Fuentes (ES), 7’

Хипнотичко патување низ една вознемирувачки колоритна и фигуративна топографија која се карактеризира со ужас; лавиринт од гробишта налик на гигантско саќе. Сепак, сенките не се секогаш под земја, а морбидниот мизансцен можеби е само увертира...

15 април (недела), 18.30
Кинотека на Македонија
9023 (2017), реж. Сотирис Петридис и Тања Нанавраки
/ Petridis & Tania Nanavraki (GR), 8’

Дистописки настан заснован на екстремна ситуација: канибализам. Алегориски и саркастичен коментар на економската ситуација во денешна Грција.

15 април (недела), 18.30
Кинотека на Македонија
СЕГАШНИНА (Nowness / Оlevik, 2017), реж. Кристина Танг
/ Kristiina Tang (EE), 9’

Визуелна поема за едно збогување со сопственото детство и саканиот дедо. Прозрачно белиот пејсаж е вознемирен од прашањето: Кога ли гавранот ќе го зграби следниот од нас во клунот и ќе го проголта?

15 април (недела), 18.30
Кинотека на Македонија
ЕКСПЛОЗИИ ВО СРЦЕТО (Explosions in the Heart, 2016)
реж. Јени Ли / Yenni Lee (NO), 17’

Интимен и речиси етеричен поглед на симбиотската врска меѓу две сестри близначки и последиците од еден трауматичен момент. Деконструкција на човечката душа што изгубила суштински дел од себе.

15 април (недела), 18.30
Кинотека на Македонија
ТИШИНАТА (The Silence / Il Silenzio, 2016)
реж. Али Асгари и Фарнуш Самади / Ali Asgari & Farnoosh Samadi (IT), 15’

Фатма и нејзината мајка се курдски бегалци во Италија. При посетата на лекар, таа мора да ѝ преведува на мајка си, но егзистенцијалниот страв што се раѓа се скаменува на усните на малата Фатма. Филмот беше во конкуренција за Златната палма за краток филм на Канскиот филмски фестивал во 2016 година.

15 април (недела), 18.30
Кинотека на Македонија
БОГ ЈА МРАЗИ ФИНСКА (God hates Finland, 2016)
реж. Јохан Каренто / Johan Karrento (FI), 10’

Црна комедија за стравот од непознатото којшто раѓа бујна и неконтролирана имагинација. Филм во кој растечката интеркултурна исклучивост денес е прикажана во сета своја глупост и бесмисла.

15 април (недела), 18.30
Кинотека на Македонија
ПОТОА (After / Posle, 2016)
реж. Хана Џалали / Hanna Jalali (UA/IR), 20’

Нечија ненадејна и неочекувана смрт најавува нова заедничка приказна, но хаосот кој го остава зад себе отвoра длабока и интимна конфронтација која неа ја оневозможува...

15 април (недела), 18.30
Кинотека на Македонија
FIFO (2017), реж. Саша Фербис и Џереми Пафет
/ Sacha Ferbus & Jeremy Puffet (BE), 13’

First in first out (FIFO) е техника за редење полици што се користи во супермаркетите. Но, системот што ги регулира правилата за заштита на имиџот на супермаркетот се коси со идејата за солидарност и Стефан ќе биде принуден да направи избор.

15 април (недела), 18.30
Кинотека на Македонија
14.15 (2016), реж. Кенан Субаши / Kenan Subaşı (TR), 9’

Безволни и рамнодушни, социјално аутистични, патниците на траектот го игнорираат музичкиот настап на 12-годишното девојче со хармоника. На крајот, конечно некој ќе ја „слушне“ нејзината музика.

15 април (недела), 18.30
Кинотека на Македонија
БАКИТ (Bakyt, 2017), реж. Мерим Догдурбекова
/ Meerim Dogdurbekova (KG), 13’

Бакит грациозно галопира на својот коњ низ киргистанската степа. Но, ноќта пред традиционалната трка неговиот коњ ќе биде украден. Топла приказна за малиот Бакит и неговата бескрајна љубов кон својот коњ.

15 април (недела), 18.30
Кинотека на Македонија
КЛУКАЈДРВЦИТЕ ОД РОТА (The Woodpeckers of Rotha / Dadyaa, 2016) реж. Пуџа Гурунг и Бибхусан Баснет / Pooja Gurung & Bibhusan Basnet (NP/FR), 16’

Добитник на специјалната награда од жирито за кинематографија на филмскиот фестивал Санденс 2017 и номиниран за најдобар краток филм на Венецијанскиот филмски фестивал 2016, Клукајдрвците од Рота е импресивен визуелен портрет на последните жители во висорамнините на далечниот Непал и нивната дилема: да останат со своите спомени, или (и тие) да си заминат.

16.04 (понеделник), 18.30
Кинотека на Македонија
ТАГАТА НЕМА ДА ТРАЕ ЗАСЕКОГАШ (The Sadness Will Not Last Forever / Het verdriet zal niet eeuwig duren, 2016)
реж. Алексеј Дмитриев / Alexei Dmitriev (RU/NL), 8’


Филмски есеј за тагата и надежта инспириран од последните зборови што Винсент ван Гог ги упатува до својот брат Тео: „Тагата ќе трае вечно“...

16.04 (понеделник)
Кинотека на Македонија
ПИ (P, 2017)
реж. Маркус Ханиш / Marcus Hanisch(DE), 19’

Две суштества, еден идентитет. За да се ослободи од чувството на вина, научникот „Пи“ ја пренесува сопствената трауматична меморија на девојка-андроид. Sci-Fi драма за потрагата по одговорот на едно од најстарите филозофски прашања – кој сум Јас?

16.04 (понеделник)
Кинотека на Македонија
ГАЛАТЕЈА (Galatea, 2017), реж.Кам Тис / Cam Thys (BE), 5’

Поетска рефлексија загубена во земја, во свет, каде што не припаѓа. Приказна за еден уметник и неговиот напор да го вдоми своето уникатно доживување.

16.04 (понеделник)
Кинотека на Македонија
ПРЕД (Before / Zanim, 2017)
реж. Михал Бјегански / Michał Biegański (PL), 20’

Аша е млада девојка која сфаќа дека е бремена, но реакцијата на најблиските ја исправа пред сета тегобност на изборот. Нежно обоено медитативно тонење во едно мачно времетраење во кое Аша треба да се соочи со својата одлука, пред...

16.04 (понеделник)
Кинотека на Македонија
МАМО, СЕ ВРАТИВ (Mum, I'm Back / Μαμά, γύρισα, 2017)
реж. Димитрис Кацимирис / Dimitris Katsimiris (GR), 5’

Едноставно но моќно филмско остварување, со јасен и енергичензаплет, кое ја тематизира чувствителната проблематика за можноста од реализација на една автентична персонализација среде конзервативната заедница.

16.04 (понеделник)
Кинотека на Македонија
ИНСТАЛИРАЊЕ НА СТРАВОТ (The fear installation / A instalação do medo, 2016)
реж. Рикардо Лејте / Ricardo Leite (PT), 15’

Краток филм за човековиот страв кој инхибира и ја разјадува егзистенцијата, и за тоа што се случува кога настанува инверзија во пирамидата на моќта, а улогите на доминација одеднаш се превртат.

16.04 (понеделник)
Кинотека на Македонија
ОДРАЗ (Reflection, 2017), реж. Батухан Ибрахим / Batuhan Ibrahim (MK), 8’

Суптилен визуелен автопортрет, интимно патување низ имагинарен дијалог, и внурнување во себе во потрагата по сопствената метафизичка основа.

16.04 (понеделник)
Кинотека на Македонија
СÈ Е ВО РЕД (Everything's Ok / Já Passou, 2016), реж. Себастиао Салгадо и Педро Патросињо /
Sebastião Salgado & Pedro Patrocínio (PT), 16’

Инспириран од краткиот расказ на Соеjро Переира Гомеш (Soeiro Pereira Gomes) - „Случај без особено значење“, напишан за време на диктатурата на Салазар, филмот ја раскажува приказната за борбата на сиромашниот Жоао да го спаси својот болен син. Воедно тој јасно илустрира дека и седумдесет години подоцна истата рамнодушност и социјални диспаритети сè уште преовладуваат во Португалија.

16.04 (понеделник)
Кинотека на Македонија
ЗБОРОВИТЕ ИМААТ КРИЛЈА (Words Fly Away / Söz Uçar, 2017)
реж. Туфан Таштан / Tufan Taştan (TR), 4’

Духовита филмска етида во чест на „Тие кои цветаа од книгите...“, кои за многумина станаа симбол на граѓанската непослушност во Турција.

16.04 (понеделник)
Кинотека на Македонија
АБРАКСАС (Abraxas, 2016)
реж. Лиор Наџар / Lior Nadjar (FR), 17’

Лучија живее далеку од илузијата на светот околу неа и одбива да се интегрира. Нејзините ноќни активности се екстатички патувања како еден вид опсесивна потрага по знаење кое ослободува. Филмот е инспириран од Седумте проповеди за мртвите (The Seven Sermons to the Dead) на Карл Густав Јунг.

16.04 (понеделник)
Кинотека на Македонија
MODERNE KUNST (2017)
реж. Марко Шантиќ / Marko Šantić (SI), 17’

Со својата форма, енергија и симболика, новата изложба започнува да го вознемирува „хармоничниот“ брак на Бојан. Комична приказна за брачна криза пренесена низ призмата на современата уметност.